酒品點評 - 麒麟本釀造活性生原酒

日本酒中分好多類型，呢支係本釀造活性生原酒。本釀造係精米步合70%以下，有加入釀造酒精嘅酒。而活性生原酒中嘅生原酒，可以再細分為生酒及原酒。生酒為未經消毒嘅清酒，原酒係沒有稀釋嘅清酒。一般清酒大約會有15-17%酒精度，原酒會稍高一點，呢支則有19%。而活性酒係將留有酵母菌嘅酒粕裝入瓶中進行二次發酵，道理跟氣泡酒相通。



由於呢支酒仲係發酵緊嘅關係，開法同一般清酒完全唔同，你要不停開蓋同閂蓋，等裡面嘅氣壓同大氣壓力一致先飲得，否則佢會噴一大堆出嚟你喊都無謂。

因為係濁酒關係，色澤自然帶白色，同時亦偏黃。倒出來會發現比較慢，怎麼這麼慢？因為米漿濃呀。而杯底你會見到好多氣泡喺度，但當然無香檳咁明顯啦始終濁酒唔夠通透。



第一口會有濃厚嘅米香，亦因碳水化合物關係味道帶甜，由於二氧化碳關係又略帶清酸，但當甜味過後酒勁就嚟喇。因為佢仍有氣泡關係，酒勁會隨住氣泡喺口中爆發，你會覺得呢隻酒特別醉人，都係氣泡作怪。

呢支冬季限定嘅濁酒，有氣泡酒嘅口感，類似甘酒嘅甜味，又有清酒嘅享受，$120就有交易實在唔貴，喜歡日本酒嘅不妨一試。