2018年4月20日 星期五

尖沙咀鶴龜 妹仔大過主人婆

每次去尖沙嘴都唔知食咩好,因為實在太多嘢可以揀,但得自己一丁友去食又食唔到幾多嘢,所以好多時都係食吓小食或者食碗麵就算,查到有間拉麵店新開,有比較少見嘅櫻花蝦沾麵,試吓無壞。



由於係新開而且係三點幾鐘,無咩客人係件幾正常嘅事。店裡嘅裝修都真係幾樸素,木枱同木色筷子好似食魚蛋河咁嘅款,加上一個唔知係特色定係甩色嘅牆身,其實成件事幾時光倒流又意外地夾。



沾麵有四款而且有得揀冷暖麵,要食就梗係食冷麵嘅。除咗沾麵仲有三款拉麵,仲可以揀麵嘅軟硬度,或者走唔走蔥筍,細節位做得幾足啵。



上枱喇﹗睇個樣都幾足料,沾汁嘅櫻花蝦鋪到滿晒,沾麵除咗叉燒溏心蛋筍乾蔥呢幾樣基本嘢之外,仲有海帶芽呢個味噌湯常客。



一手摸落碗沾汁度,個碗熱到辣手即時一縮,好明顯個碗係比沾汁更加熱,咁樣做就有保溫效果。雖然小處有著眼,但沾汁就不過不失,個汁唔會過鹹亦食到蔬菜嘅清甜,唔需要加湯割都可以成碗飲晒。另外櫻花蝦的確用咗唔少,但一清晒櫻花蝦個汁就無晒蝦味,不如攞部份蝦去煮沾汁咪仲好。


大堆頭無以為繼

沾麵呢邊都係大堆頭,啲配料基本上冚晒成碗麵。



但佢真係得個樣唔錯,沾麵係結實得嚟無彈性,口感自然唔好,無落鹼水可能係原因,但其實可以喺麵粉上著手,其他舖頭無鹼水味得嚟都可以彈牙,無理由做唔到嘅。

而叉燒可以話係燈影叉燒,三塊加埋都唔夠人地一塊厚,除咗要讚一下刀功外,就梗係要彈塊叉燒無咬口,切到咁薄完全食唔出究竟入唔入味,尚幸有啲火炙味點綴下,成件事無咁寡。


燈影叉燒味道淡,麵質較硬欠彈性

溏心蛋個樣的確係溏心嘅,但係睇色水就知唔夠入味,軟熟度可以但好細粒,照計細細粒應該容易入味先係嫁…


人地仔細老婆嫩,佢地蛋細唔夠嫩

老實講呢度嘅基本功真係做得麻麻,有注意到細節位,主動加水同埋禮貌良好係件好事,但去餐廳食嘢,梗係嘢食質素排先。仲要拉麵唔係平嘅菜式,以呢度嘅定價,其實有更抵更好食嘅選擇啦,不過開業初期,應該有進步空間嘅。

價錢:$93

沒有留言:

張貼留言