2017年10月10日 星期二

觀塘神山麵屋 水準極高嘅新店

又一個過江龍沾麵登陸香港,今次係好近我嘅觀塘區APM,一聽到個地方好熟口面,一望果然上手就係麵屋武藏,真係拿拿聲試咗先,唔係到時執咗笠就唔知點算,始終呢個位腳頭唔好啊。其實一開店嗰時,聽到個風評一般都有啲驚,尤其是上手令我勁失望,希望今次無事啦。




本身喺下晝未到晚飯時間去到,但係沾麵賣清,要六點半先再供應,就周圍行下先。到差唔多六點半已經有人喺度排隊,好彩我得一個人好快就入到去。

佢哋就唔係提供冰水,係熱辣辣嘅麥茶,不過我就唔著緊呢樣野,就算係日本有時都係比綠茶你飲。



佢哋個廚房係開放式,可以睇到廚師煮麵,又可以乘機偷師。



其實佢就有兩款沾麵,一款係普通嘅叉燒,另一款係豚角煮,價錢就相差無幾,咁梗係點豚角煮啦,肥膩好多嫁。



聽講佢哋嘅餃子都幾出名,不過睇落份量都唔少,食完沾麵未必食得晒,就唔好浪費喇。



亦都有唔同嘅小食,不過點解鱈魚係屬於空唔係海?



因為都好多人同一時間點沾麵,所以都等左一陣,不過十零分鐘等得過嘅。



首先試吓碗湯,餐牌到寫佢碗湯大概係六十度,食落果然唔算好熱,甚至我懷疑係咪真係有六十度,不過個沾汁的確係唔錯,味道唔會太鹹,豬骨同醬油味平衡得唔錯,飲落去唔會好漿喉,細心啲品嚐甚至會食到啲甜味。


香濃沾汁唔覺膩

麵條亦幾又有咬口,而且冇乜鹼水味,但我會鍾意佢再硬身啲,或者係太多柯打一齊落影響到質素。細心啲睇麵條中間其實有條坑紋,店方話係方便將沾汁帶上麵條,增加咗表面面積更易掛沾汁,呢點我同意嘅。


特制麵條有水準

豚角煮夠肥美已經可以加分,食落去有味噌同薑嘅味道,肥得嚟有少少辣平衡返,帶甜之餘又有炭火嘅氣息,尤其係肥油同炭香混合係頂級享受,絕對係高水準作品。


滿口油花夠邪惡

隻蛋就自己睇相喇,啲蛋黃流晒出嚟,隻蛋又夠滑溜,而且真係食到醬油香味,係掂喎。


半熟溏心超滑溜

最後就梗係要加啲清湯落個沾汁度飲晒佢,佢個清湯其實係鰹魚汁,但鰹魚味略淡左啲,想飲濃湯就因應返自己嘅喜好加幾多鰹魚汁喇,不過個清湯一樣唔算太熱,可能有啲人就唔太鍾意,我就係其中之一。


清湯微溫感可惜

一開始因為聽到個風評就唔抱太大期望,但食落去完全係喜出望外,如果佢能夠保持到今次嘅水準,我諗佢會喺香港沾麵嘅頭幾名,不過佢嘅份量少咗啲,只係去到我六七分飽。

價錢:$93.5

沒有留言:

張貼留言